Psa 140 | NdeIBE | STEP | Kumqondisi wokuhlabela. Ihubo LikaDavida. Ngilamulela, O Jehova, ebantwini ababi; ngivikela ebantwini bodlakela,

Psalms 140

1 Ngilamulela, O Jehova, ebantwini ababi; ngivikela ebantwini bodlakela,

2 abakha amacebo amabi ezinhliziyweni zabo bahlokomise impi ukusa kwamalanga.

3 Benza izindimi zabo zicije njengezenyoka; ubuhlungu benhlangwana busezindebeni zabo.

4 Ngivikela, O Jehova, ezandleni zababi; ngiphephisa ebantwini bodlakela abaceba ukungigwenxa.

5 Abantu abazigqajayo bangifihlele isifu; sebewanwebile amambule abo bangithiya lapha lalapha endleleni yami.

6 O Jehova, ngithi kuwe, “UnguNkulunkulu wami.” Zwana, ukukhala kwami ngicela umusa.

7 O Jehova wobukhosi, mhlengi wami olamandla, ovikela ikhanda lami ngelanga lempi

8 ungavumeli ababi izifiso zabo O Jehova; ungayekeli amacebo abo ukuthi aphumelele, funa bazigqaje.

9 Akuthi izingqondo zalabo abangihanqileyo zandelwe luhlupho oludalwe yizindebe zabo.

10 Akuthi amalahle avuthayo abakhithikele; sengathi bangaphoselwa emlilweni, emigodini ebhixika udaka, bangavuki futhi.

11 Akuthi abahlebayo bangatholi indawo elizweni; akuthi umnyama ubahlale izithende abantu bochuku.

12 Ngiyazi ukuthi uJehova ubenzela okulungileyo abayanga, ubamele abaswelayo.

13 Ngempela abalungileyo bazalidumisa ibizo lakho labaqotho bazahlala phambi kwakho.